БИШКЕК, 20-авг. — Sputnik. Октябрь районунда "Тазалык" ишканасынан таштанды чыгарууга бекитилген кызматкерлери ишти атайылап үзгүлтүккө учуратып жатканын Бишкек мэри Кубанычбек Кулматов премьер-министрдин шаар активи менен жолугушуусу учурунда билдирди.
Анын айтымында, Бишкектин Биринчи май, Свердлов жана Ленин райондорунда абал салыштырмалуу туруктуу.
"Октябрь районунда жумуш атайылап үзгүлтүккө учурап жатат. "Тазалыктын" кызматкерин алмаштырганыбызга карабастан, тымызын саботаж уланууда. Учурда жети унаа бузулуп, иштен чыкты. Анын ар бирин оңдоого 300-400 миң сом керектелет. Бул бир эле кишинин колунан чыккан иш", — деди калаа башчысы.
Кулматов учурда таштанды кол менен чыгарылып жатканын кошумчалады. Анын билдиришинче, "Тазалыктын" райондук бөлүмүнүн башчысына бир нече ирет кылмыш иши козголсо да, ал башка ат менен кайра эле жумушка орношуп келген.
"Тазалыктын" кызматкерлерине карата 10 кылмыш иши козголгон. Бир жарым жылдан бери создугуп жатат, эми прокуратурага берип жатабыз", — деди мэр.
Премьер-министр өз кезегинде шаардык прокуратурага ишти өз көзөмөлүнө алып аягына чыгарууга тапшырма берди.
