БИШКЕК, 7-июль — Sputnik. Баткен облусунун Көчө-Карын айыл аймагында кыргыз-тажик мамлекеттик чек арасындагы адамдын өмүрүн алган окуя Кыргызстандын аймагына чек арадан 80 метр ичкери жерде болгон. Бул туурасында эки өлкөнүн чек ара кызматтарынын өкүлдөрү чатактын себебин аныктоо үчүн болгон жолугууда белгилүү болгонун Мамлекеттик чек ара кызматынын маалымат кызматы билдирди.
Атышуудан жаракат алган тажик жараны ооруканада көз жумганын Тажистан тарап жолугушуу учурунда кабарлады.
"Тажикстан тарап окуя учурунда ок жеген жараны ооруканага жеткирилгенден кийин каза болгонун билдирди. Тергөө органдарынын алдында ал жаран кимдин куралынан ок жегендигин аныктоо иштери турат", — деп билдирди аталган ведомствонун маалымат кызматы.
Баткен облусунун Көчө-Карын айыл аймагында кыргыз-тажик мамлекеттик чек арада 6-июнда куралдуу кагылыш болуп, тажик жараны ок жеген.
