БИШКЕК, 8-июнь — Sputnik. Алдыдагы үч күндө өлкө аймагында аба ырайы кескин өзгөрүп, тоолуу аймактарда кар жаай турганын Өзгөчө кырдаалдар министрлиги эскертет.
9-июндан 11-июнга чейин өлкө аймагында аба ырайы туруксуз болуп, улам өзгөрүп турат. Мезгил-мезгили менен нөшөрлөп жаан жаап, бийик тоолуу аймактарда кар түшүүсү мүмкүн. Кээ бир райондордо батыштан соккон шамалдын ылдамдыгы секундасына 18-23 метрге чейин жетет. 9-июндан баштап абанын күндүзгү температурасы кескин төмөндөйт.
Чүй, Талас, Ош, Жалал-Абад, Баткен облустарынын дыйканчылык аймактарында +20…+25 градус, тоо этектеринде жана Ысык-Көл, Нарын облустарынын дыйканчылык аймактарында +13…+18°, бийик тоолуу райондордо абанын температурасы —2 градустан +3 градуска чейин жылуу болот.
