БИШКЕК, 28-май — Sputnik. Сириядагы чыр-чатактар жүрүп жаткан аймакта Кыргызстандык онго жакын жаш бала бар. Бул туурасында УКМКнын маалымат кызматынын жетекчиси Рахат Сулайманов Sputnuk маалымат сайтына билдирди.
Анын айтымында, учурда Кыргызстандан "Ислам мамлекети" радикалдык уюмун көздөп, Сирияга жихад деген тайкы түшүнүк менен аттангандар бала-чакасын кошо ала кеткен. Бүгүнкү күндө Кыргызстандан Сириядагы идеяларга алданып, азгырылып, ар кандай себептер менен 330 адам аттанган.
"Ал жакта жүргөн кыргызстандык жарандардын айрымдары үй-бүлөсүн, балдарын алып кеткен фактылар бар. Бүгүнкү күндө ал жакта сегиз жашка чейин саны онго жакын кыз бала, эркек бала болушу мүмкүн", — деди Сулайманов.
2015-жылдын май айынын аягында Улуттук коопсуздук боюнча мамлекеттик кызматы Ош шаарынын аба майданынан Сирияга жөнөөгө камданып, өздөрү менен кошо балдарын ала кетип бара жаткан Тажикстандын үч жаранын кармаган.
