Эгембердиевдин каза болгондугуна байланыштуу президент, мамлекеттик ишмерлер көңүл айтты

© Sputnik / Актан ТемиркановТабылды Эгембердиев. Архивное фото
Табылды Эгембердиев. Архивное фото - Sputnik Кыргызстан
Жазылуу
Президент Алмазбек Атамбаев жана бир катар мамлекеттик ишмерлер кыргыз элинин татыктуу уулдарынын бири Табылды Эгембердиевдин жаркын элеси түбөлүк элдин эсинде сакталаарын белгилешти.

БИШКЕК, 18-май — Sputnik. Табылды Эгембердиевдин дүйнөдөн кайткандыгына байланыштуу президент, спикер жана премьер-министр, депутаттык корпус жана коомдук ишмерлер, интеллигенция өкүлдөрү маркумдун үй-бүлөсүнө көңүл айтты.

"Табылды Эгембердиев өңү менен, баскан-турганы менен, башкаларга жасаган мамилеси менен, ойлогон ою менен нукура Кыргыз эле. Сөзү эмес, иши менен Мекенинин экономикасына, беделине, мамлекеттүүлүгү менен эгемендигинин чыңдалышына салымын кошкон ар кырдуу инсан катары баарыбызга өрнөк. Кыргыз элинин татыктуу уулдарынын бири Табылды Эгембердиевдин жаркын элеси түбөлүк эсибизде сакталат", — деп айтылат көңүл айтууда.

Көңүл айтууда анын 1990-жылдардын башында коомдук-саясий турмушка активдүү аралашып, “Кыргызстан” Демократиялык Кыймылын (КДК) негиздөөчүлөрдүн алдыңкы сабында турган жана өлкөдөгү демократиялык өзгөрүүлөргө зор салымын кошкондугу айтылат.

"Кыргызстан эгемендикке жеткен алгачкы жылдары коомубуздагы өзгөрүүлөр тууралуу кыргыз жана орус тилдеринде жазган курч макалалары аркылуу публицист катары таанылган", — деп белгилеген аны эскерүүдө. 

Эгембердиевди эскергендер "Супарага" барып гүл коюп жатышат
Эгембердиев эски система ыдырай баштаган 1990-жылдар башында көпчүлүк эмне кылаарын билбей алдастап турган чакта кол куушуруп отуруп калбастан, же болбосо өзүнүн ондогон шакирттери менен бирге саясатка жана бийликке умтулбастан, күнү-түнү изденип, жеке ишкердикке алгачкылардан жол чапкан. 1992-жылы кыргыздын улуттук суусундуктарын чыгарган "Шоро" компаниясын негиздеген, бул улуттук бизнесте алгачкы саамалык болгон эле. Күндө өзүбүз үйдө ичкен жарма, максым, кымыз, айран сыяктуу суусундуктарды өнөр жайлык негизге салуу аркылуу изденген адам жайдак жерден да иш жасап, киреше таба алары мүмкүн экенин далилдеген.

Табылды Эгембердиев 1996-жылы базар экономика шартында жемиштүү ишмердүүлүгү үчүн "Даңк" медалы менен сыйланган.

Акыркы жылдары тоо туризмин өнүктүрүүгө шымаланып киришип, өлкөбүздө эле эмес, региондо сейрек кездешүүчү этнокомплекстерин түптөп, ийгилигин арттырган. Бул жайлар азыр чет жердик саякатчылар байма-бай каттаган Кыргызстандын туристтик бизнес жүргүзүүнүн үлгүсү болуп калды.

Жаңылыктар түрмөгү
0