БИШКЕК, 15-май — Sputnik. Муниципалдык "Зеленстрой" ишканасы "Ала-Тоо" аянтындагы жашыл майсаңга отургузулган гүлдөрдү Энелер майрамында болуучу концертте эл тепсеп сала тургандыктан, убактылуу казып алып жатат. Бул туурасында аталган ишкананын агроному Сергей Кравер Sputnik сайтына билдирди.
Sputnik сайтына шаардыктар Жеңиштин 70 жылдыгына карата борбордук аянтта отургузулган гүлдөрдү кайра казып алып жаткандыгын билдиришкен. Башкы агрономдун айтымында, аянтка 80 миңге жакын гүл отуругузулса, 9-майда майрамдоого чыккан эл анын 3 миңге жакынын тебелеп салган.
"Баркыт гүлдөрдү жашыл майсаңдын ортосуна салынган кичинекей жолдор да сактап кала албаптыр. Бул гүлдөр негизи өсүмдүү келет, бирок аны шаардыктар толук ачылып өскөнгө жеткирбей эле тебелеп салышты", — деди Кравер.
Ал мындай гүлдөр Чүй проспектиси менен Эркиндик гүлбагына да отургузулганын кошумчалады.
"Ар бир гүл 30 сомдун тегерегинде турат, эл биздин мээнетти баалабай келет. Ишемби күнү Энелер күнүнө карата боло турган концертте 9-майдагыдай эле көрүнүш кайталанат", — деп оор күрсүндү агроном.
"Зеленстрой" ишканасынын өкүлү казып алынган гүлдөр Энелер күнүнө карата концерт бүткөндөн кийин, дүйшөмбү күнү кайра аянтка отургузуларын кошумчалады.
