Ажылык сапар быйыл, 2015-жылы 2,5 миң доллар болду

БИШКЕК, 12-май — Sputnik. Быйылкы ажылык сапар 2,5 миң доллар болот деп билдирди муфтийдин орун басары Замир кары Ракиев. 

Быйыл ажыга барып мусулмандык милдеттеринин бирин аткарып келүүчүлөргө 3 685 орун берилмекчи.

Ракиевдин айтымында, ажылык сапардын быйылкы баасы 2,5 миң доллар. Бул каражатка жашай турган мейманкана, тамактануу, камсыздандыруу жана дагы башка кызмат көрсөтүүлөр кирет.

"Биздин атуулдар шарты жакшы мейманканаларда жашайт. Ажылык сапар башка өлкөлөргө караганда бир кыйла арзан. Маселен, Өзбекстан менен Казакстанда эки эсе кымбат", — деди Кыргызстан мусулман башкармалыгынын муфтийинин орун басары Ракиев. 

Ал штабга 125 квота бөлүнгөнүн кошумчалады, алардын ичинен 76сы – ажы башчылар, 20 адам — штаб кызматкерлери, 12 – "Мухамед пайгамбарды таанып-билебиз" конкурсунун жеңүүчүлөрү. Андан сырткары, министрликтер үчүн да квота бөлүнгөн. Ажыга баруучуларды каттоо 1-июнга чейин болот. 

Ракиевдин айтымында, каттоодон кийин электрондук чүчү кулак кармоо болот. Ал былтыр ажылыкка бара албай калгандарга быйыл жакшы мүмкүнчүлүктөр түзүлөрүн айтты. 

"Эгерде кишиге төрт жыл катары менен чүчү кулак туш келбесе, ал бешинчи ирет кезексиз өтөт", — деди муфтийдин орун басары.

Ал ажыга барчуларды Аравиянын "Флай нас" компаниясы ташый тургандыгын, каттамдар Бишкек жана Ош шаарларынан Сауд Аравиясына түз уюштуруларын айтты.