БИШКЕК, 9-май — Sputnik. Ысык-Көл облусунун Корумду айылында Таалайбек Боромбаев тарабынан курулган эстелик ачылды. Ал уюн сатып анын акчасын эстеликке жумшаган.
Боромбаевдин айтымында, Улуу Жеңиштин 70 жылдыгын белгилөө күнүндө эстеликтин ачылышына 400дөй киши келген.
"Биздин айылдан согушка кеткендердин урматына эстеликтин ачылганына абдан кубанычтамын. Мен бул ишти көптөн бери пландап жүргөм, эми менен көңүлүм ток. Мындай аракеттер менен биз Улуу Ата мекендик согушта каза болгондорго таазим кылабыз", — деди Боромбаев.
Ал ошондой эле, эстеликтин ачылыш урматына окуучулар согуш маалын чагылдырган спектакль жана майрамдык концерт уюштурушканын айтты.
Көрүүсү начар, I топтогу майып Таалайбек Боромбаев эстеликти куруу үчүн уюн саткан. Ал ошондой эле мемориалды курган жумушчулардын курсагын тойгузуш үчүн дагы бир уй жана бир канча кой сойгон.
Үч мрамор ташына Корумду айылынан согушка кеткендердин аттары чегилип жазылган. Аны даярдоого 4 миң доллардай акча кеткен.
Ысык-Көл облусунун Түп районундагы Корумду айылынан Улуу Ата мекендик согушка 119 киши кетип, анын 79у мекенине кайткан эмес.
