БИШКЕК, 30-апр. — Sputnik. Учурда Токтогул суу сактагычында 6 млрд. кубометрге жетип-жетпеген суу калгандыгын айткан депутат Нурбек Мурашев сууну Өзбекстанга кеткен агымын чектөө жолу менен көбөйтүүнү сунуштады.
Анын айтымында, өкмөт Токтогул суу сактыгычында 6 млрд. кубометр суу бар деп жатат, бирок, андан ылдый түшүп кеткендиги көрүнүп турат. Ал эми Өзбекстанга суубуз толуп тургансып агып кетүүдө.
"Ошону биз үнөмдөөгө барбайлыбы. Азыр реконструциялоо башталат, төрт агрегаттын бири да иштен чыгыптыр. Учурда Өзбекстанга азыраак коё берсек, күзгө чейин 11-12 миллиарддын тегерегинде топтоп ала алат экенбиз. Бул боюнча комиссия түзөбүзбү, күзгө чейин чектөө коёбузбу, ушул маселени карабайлыбы ", —деди депутат.
Ал эми ЖК төрагасы Асылбек Жээнбеков быйыл сууну топтоо боюнча атайын иш-чаралар белгилендигин, бул боюнча маселе жаралбастыгын айтты.
"Суунун көлөмүнө карабай, былтыр электр энеригясы сапаттуу жана жетиштүү берилди", — деди спикер.
"Электр станциялары" ишканасы 15-апрелден тарта Токтогул суу сактагычында суу акырындык менен топтоло баштагандыгын, көрсөтүлгөн бул датага карата суунун агып кириши чыгым менен бирдей болуп, учурда 6 млрд. 225 млн. кубометрге жеткенин билдирди.
