БИШКЕК, 18-апр. — Sputnik. Эгер парламент мыйзам долбоорун жактырса, 1-сентябрдан баштап мугалимдердин айлыгы 1,5 – 2 эсе жогорулай турганын билим берүү министри Элвира Сариева КСДП фракциясынын жыйынында билдирди.
КСДП фракциясынын жума күнкү жыйынында билим берүү министри Сариева 2015-жылдын күз айынан баштап мугалимдердин айлыгы бир кыйла жогорулашы күтүлүп жатканын айтты.
"Эгер азыр башталгыч класстын мугалимдери 6-7 миң сомдон алса, маяна жогорулагандан кийин анын көлөмү 10-11 миң сомго жетет. Ал эми орто жана жогорку класстын мугалимдеринин айлыгы 6,5 миңден 9,5 миң сомго чейин көтөрүлөт", — деди министр айым.
Сариева ошондой эле, пландалган ишти аткаруу үчүн керек болгон 4,5 миллион сом бөлүүнү парламент жактырышы керек экенин кошумчалады.
Белгиленген бул суммага башталгыч класстын мугалимдеринин жана мектептеги техникалык кызматкерлердин айлык акысын жогорулатуу каралган. Андан сырткары мамлекеттик бала бакчалардын тарбиячылардын айлыгын көтөрүүгө кете турганын маалымдады.
Министр "мастер", "устат" жана "методист" деген түшүнүктөр киргизиле турганын кошумчалады. Эгер жаш мугалимге тажрыйбасы бар мугалим жардам берип, жол көрсөтө турган болсо үнөмдөлгөн каражаттардан түзүлгөн мектептин фондунан акча төлөнүп бериле турганын түшүндүрдү.
