БИШКЕК, 11-апр. — Sputnik. Президент Алмазбек Атамбаев кумар оюндарына тоскоол кыла турган шарттарды караган мыйзамга кол койду деп мамлекет башчынын маалымат кызматы билдирди.
Ал "КРдин айрым мыйзам актыларына өзгөртүүлөрдү жана толуктоолорду киргизүү жөнүндө" мыйзамдын бириктирилген долбоору.
Мыйзамдын негизги максаты — кумар оюндарына тыюу салуу, андан сырткары кумар оюндарын уюштуруп жана ага шарт түзгөн жайларды (букмекердик кеңселер жана компаниялар, тотолизаторлор) кармоого тыюу салуу. Мыйзам тарабынан кумар оюндарына азгырылган жана кызыккандардын адеп-ахлактык жана психикалык абалына терс таасирин тийгизгенге шарт түзүп берүүгө тоскоолдук коёт, бул биринчи иретте жаштарга көрүлгөн камкордук.
Документ каржылык мыйзам бузууларды, өлкөдөгү криминалдык абалды төмөндөтүү, социалдык көйгөйлөрдүн алдын алуу, жашы жете электерди жана калктын социалдык жактан корголбогон катмарын кумар оюндарынан коргоого багытталган.
Мыйзамды парламенттин бир нече депутаттары жана өкмөт демилгелеп, Жогорку Кеңеш тарабынан 2015-жылдын 25-февралында кабыл алынган.
Салык кызматынын маалыматына карганда, учурда республикада 107 букмекердик жайлар бар. Алардын ишмердүүлүгүн көзөмөлгө алган так мыйзамдын жоктугунан, жогорудагы терс көрүнүштөр коомчулукта орун алып келет.
