БИШКЕК, 2-апр. — Sputnik. Мурдагы бала бакчанын 478 имараты кезегинде министрлик менен ведомстволорго, диний уюмдарга берилип кетип, учурда ар кандай максатта колдонулуп жатат. Бул туурасында ЖК депутаты Абдыжапар Бекматов Sputnik маалымат сайтына билдирди.
Эл өкүлү ЖК тапшырмасы боюнча бала бакчалар кайтарылгандыгын айтып, бирок, учурда республика боюнча 478 бала бакча ар башка багыттарда колдонулуп жаткандыгын айтты.
"Алардын 98и мамлекеттин менчигине, 171и муниципалдык менчикке берилип кетсе, анын ичинен 12си медресе менен мечитке айланган. Жеке менчикке 209у чыгып кеткен", — деди Бекматов.
Анын айтымында, ИИМдин бир катар шаарлардагы башкармалыктары, соттор бала бакчалардын имараттарында отурат, андан сырткары, ФАП, мектеп ж.б. жайларга айланып кеткендери да кездешет.
"ИИМдин ар түрдүү деңгээлдеги бөлүмдөрү, башкармалыктары, соттор, салык кызматынын, социалдык өнүктүрүү министрлигинин, УКМКнын, прокуратуранын жана диний уюмдардын ээлеп алган фактылары бар. Учурда кээ бир бала бакчада бир тайпадагы балдардын саны 50ге чейин жетет, анан ал жерде билим, тарбия сапаты кандай болот? Мен алардан бала бакчаларды кайра кайтарып беришин суранат элем", — деди Бегматов.
Кыргызстанда жаңы бала бакча курууга мамлекеттик бюджеттен каражат дээрлик бөлүнбөй келет, а бирок башка булактардын эсебинен бала бакчаларды куруу жүрүп жатат. Мамлекет аларды каржылоого бюджеттен каражат карай албагандыктан, бир катарлары ачылбай жатып эле жабылууда.
Ысык-Көл районун Темир айыл өкмөтүнө караштуу Кашат айылындагы 120 орундук бала бакчанын ата-энелер комитетинин өкүлдөрү өкмөт өзү курбаса да, жок дегенде, даяр жайда иштей турган тарбиячыларга айлык акы төлөп бере албай жаткандыгын айтып күйүп-бышкан.
Ал эми Жалал-Абад облусунун Сузак району боюнча жаңы 9 бала бакча ачылып, акча төлөнбөгөндүктөн, четинен жабыла баштаган. Бир жыл иштегенден кийин каражаттын айынан ишин токтоткон 75 орундуу бала бакчанын жетекчиси Урматхан Авилова, аргасыз абалда калганын билдирген.
