БИШКЕК, 10-мар. — Sputnik. Токмок шаарындагы "Себат" кыздар лицейинин директору Шевкет Тутар бир катар жалпыга маалымдоо каражаттарына чыккан окуучулар эшектин этинен ууланды деген маалымат калп экендигин айтты.
Токмок шаарынын аймактык ооруканасынын жугуштуу оорулар бөлүмүнө 2015-жылдын 20-февралында "Себат" лицейинен 13 окуучу кыз түшкөн. Балдар ичи ооругандыгын айтып, дарыгерлер тамак-аштан уулануу болгондугун аныкташкан. Ооруканадан көзөмөлдөн өтүп, балдардын абалы канаттандырарлык болуп калгандан кийин, үйлөрүнө жиберилген. Бул окуядан кийин кыргыз журналистине шилтеме берген түркиялык жалпыга маалымдоо каражаттары (ЖМК) балдар эшектин этинен ууланды деп жазып чыккан.
Тутардын айтымында, журналист окуя болгон жерге келип, өз көзү менен көрүп, билип туруп анан жазса болмок.
"Окуучулардын өмүрү азыр коркунучта эмес. Санитардык эпидемиологиялык көзөмөл инспекциясы уулануу быштактан болгондугун аныктаган. Азык-түлүктөрдү тиешелүү уруксат-тастыктамасы бар ири фирмадан алганбыз. Иликтөө жүргүзүү үчүн лицейдин иши токтотуп, бардык материалдарды санэпидкөзөмөлгө, шаардын мэриясына жана прокуратурага өткөрүп бердик", — деди лицейдин директору.
20-февраль күнү Токмок шаарындагы башталгыч класстын окуучулары ууланган. Санитардык-эпидемиологиялык көзөмөлдөө борбору анын себеби быштак менен сүттөн экенин аныктаган.
Буга чейин Эл аралык "Себат" билим берүү мекемесинин жетекчилиги Кыргызстандын тиешелүү кызматтарына бул окуялардын изилдениши боюнча кайрылуу жасаган. Анын жыйынтыгына жараша, билим берүү мекемеси ар-намысын жана беделин коргоо боюнча соттук доо арыз даярдала турганын маалымдаган.
