Бишкек, 4-мар. — Sputnik. Келерки кышта Кыргызстан коңшу мамлекеттер Казакстан, Түркмөнстан жана Тажикстандан электр кубатын сатып алышы мүмкүн. Бул туурасында шаршемби күнү "Кыргызстандын улуттук электр түйүндөрү" ачык акционердик коомунун башкы директорунун 1-орун басары Алексей Бородин айтып берди.
"Эгерде Токтогул суу сактагычына суунун көлөмү толбой, суунун тартыштыгы байкалса, анда Казакстан, Түркмөнстан жана Тажикстандан электр кубатын сатып алышыбыз мүмкүн", — деди Бородин.
Анын айтымында, 2015-жылдын ноябрына чейин Кыргызстандагы эң ири Токтогул суу сактагычында 12 млрд. кубометр суунун тотполушу болжолдонууда.
Кыргызстандын өкмөттөр аралык келишимдин негизинде, коңшу Казакстандан электр кубатын сатып алуусу улантылууда.
"Бүгүнкү күнгө чейин Казакстандан 411 млн. киловатт-саат электр кубатын сатып алдык. Келишим 2015-жылдын 1-апрелине чейин түзүлүп, анда импорттоло турган көлөм 1 млрд. киловатт-саат деп белгиленген", — деп билдирди Бородин.
Кыргызстан өлкөдөгү электр энергиясы жаатында түзүлгөн каатчылыктан улам, 1-декабрдан тартып Казакстандын электр кубатын сатып ала баштаган.
Ал эми бир катар адистер Кыргызстандын электр энергияга болгон таңкыстыгы 3 жылга чейин созулушу ыктымалдыгын эскерткен жайы бар.
