Бишкек, 12-фев.— Sputnik. Эл арасында диний-экстремисттик уюмдун идеясын жайылтып жана Сирияга кетүүгө үндөдү деген күнөө менен кармалган Кара-Суу шаарындагы "Аc-Сарахси" мечитинин имамы Рошад Камалов эки айга камалды. Анын жактоочуларынын бири Валерьян Вахитов анын камоо мыйзамсыз өткөндүгүн айтса, Ош облустук ички иштер башкармалыгы бардыгы мыйзамдарды чегинде болгондугун билдирди.
"Рошид Камаловдун баш коргоо чарасын өзгөртүү боюнча сот процесси 11-февралда Ош шаардык Ички иштер башкармалыгынын имаратында болду. Соттун кабинети, залы бар, ошол жерде өткөрүш керек деген каршы пикирибизди айттык, бирок, канааттандырылган жок. Сот аны эки айга, тактап айтканда, 9-апрелге чейин камалып турсун деген токтомун чыгарды. Мен, Назгүл Сүйүнбаева, Хусанбай Салиев болуп үч адвокат бул жерде мыйзам бузулуп жаткандыгын айттык", — деди Вахитов.
Ал эми Ош облустук ички иштер башкармалыгынын маалымат кызматынын жетекчиси Жеңиш Ашырбаев сот процессинин Ош шаардык ИИБде өткөрүлгөнү коопсуздук чараларды көрүү максатында болгондугун, анын жактоочулары муну менен жумурткадан кыр издеп жаткандыгын айтты.
"11-февралда 48 саат мөөнөттөн кийин баш коргоо чарасын өзгөртүп, камакка алуу же бошотуу боюнча соттун кароосу өтүп, камоо боюнча санкция болду. Жаран коопсуздук чараларын көрүү максатында сот шаардык ИИБдин имаратында өттү. Жактоочулар ага "эмне себептен Ош шаардык сотуна алып барбасыңар" деп нааразы болуп жатышат. Бардыгы коопсуздук чараларды көрүү максатында жасалды. Ал жерде атайын тергөө начальнигинин кабинети бошотулуп берилип, эч кандай тоскоолдуктар болгон жок. Жактоочу менен сот гана кирди. Бул жерден жумурткадан кыр чыгарып жатышат. Кылмыш процессуалдык кодексинде көрсөтүлгөн процесстердин бардыгы сакталды. Буга чейин практикаланбадыбы, кайсы жерде коопсуз болсо, ошол жерге өткөрөбүз да. Баш коргоо чарасы өзгөртүлүп, эки айга камакка алуу боюнча санкция берилди", — деди Ашырбаев.
10-февралда ИИМдин 10-башкы башкармалыгы Кара-Суу шаарындагы "Аc-Сарахси" мечитинин имамы Рошад Камалов эл арасында диний-экстремисттик уюмдун идеясын жайылтып жана Сирияга кетүүгө үндөп жүргөн деген күнөө менен кармалган. Ал 2006-жылы август айында атайын кызматтардын антитеррордук операциясында жок кылынган имам Рафик (Мухаммадрафик) Камаловдун баласы.
