БИШКЕК, 30-дек — Sputnik. Россиядан келе турчу газдын баасы өлкө тургундары үчүн бирдей боло турганын "Газпром Кыргызстан" ЖЧКсынын башкы директорунун кеңешчиси Арзымат Алдаяров Sputnik сайтына билдирди.
Анын айтымында, газ аймакка келе баштады жана 2-3 күн ичинде толугу менен берилет.
"Буга чейин өлкөнүн түштүгү менен түндүгүндөгү баалар түрдүү болгон. Эми тариф бардык абоненттер үчүн бирдей болот", — деди Алдаяров.
"Газпром Кыргызстан" ЖЧКсы тараткан маалыматка ылайык, жаңы тарифтер 2015-жылдын январь айында доллардын расмий курсу боюнча аныкталат. Курсту Улуттук банк ар бир айдын башында бекитип турат.
"Газпром Кыргызстан" ЖЧКсы маалымдагандай, 2015-жылы жаратылыш газын алып келүү боюнча Gazprom Schweiz AG компаниясы менен келишимге кол коюлган. Ал ылайык, көгүлтүр от 2014-жылдын 30-декабрында Кыргызстандын аймагына келип баштады. Аталган ишканадан алынып келе турчу жаратылыш газынын көлөмү 100 миллион кубометрди түзөөрүн билдиришти.
