БИШКЕК, 27-дек — Sputnik. Биометрикалык маалыматтарын берүүдөн баш тарткан жарандардын укугунун тебелениши боюнча арыздарды карап чыгам, бирок мага арыздар келип түшө элек, деди мамлекет башчы Алмазбек Атамбаев.
Анын айтымында, бул маселе боюнча айтылып жаткан арыздардын бардыгы "интернеттеги имиштердин" деңгээлинде калууда.
"Мунун бары интернеттеги имиштердин деңгээлинде калып жатат. Эгер ушундай арыздар боло турган болсо, толугу менен коргоого алам. Бир да арыз жок, мага фактыларды бергиле, өзүм карап чыгам", — деди президент.
Атамбаев ошондой эле, күнөөлүүлөр кызматынан алынганга чейин барарын баса белгиледи.
