БИШКЕК, 11-янв. — Sputnik. Бишкек шаарынын мэрлигине талапкер болгон Нурдин Абдылдаев журналисттерге шайлоо кысымга туш болду деген пикирин билдирди.
Бүгүн, 11-январь күнү, мэр шайланып, ага талапкер болгон Албек Ибраимовго 29, ал эми экинчи талапкер Нурдин Абдылдаевге 12 депутат добуш берген. Бул маалда мэриянын алдында Ибраимовдун тарапташтары чогулуп, митинг уюштурушту.
"Жаңы мэрге ийгиликтерди каалайм. Бирок шайлоо кысымга туш болду. Митингчилер тууралуу баарыңыздар эле уктуңар да, бул кысымдын бир түрү деп эсептелет. Балким, депутаттар менен жекече иш алып барылгандыр", — деди Абдылдаев.
Ибраимовдун маалымат жыйынында Абдылдаев аны жеңиши менен куттуктап, "шайлоо кысым алдында өткөнү өкүнүчтүү" экенин кошумчалады.
Ал эми "Кыргызстан" фракциясынын депутаты Таалайбек Сагынов анын фракциясына эч ким кысым көрсөтпөгөнүн белгиледи.
