БИШКЕК, 5-янв. — Sputnik. Кыргызстандын президенти Алмазбек Атамбаев менен Кытай эл республикасынын төрагасы Си Цзиньпин дипломатиялык кызматташуунун 25 жылдыгына карата бири-бирине куттук телеграммаларын жөнөтүштү.
Атамбаевдин куттуктоосунда эки мамлекеттин дипломатиялык алакасы чейрек кылымды камтып, бул убакыт ичинде эки тараптуу соода-экономикалык маданий-гуманитардык байланыштар жолго коюлганы, ошондой эле коопсуздук жаатында дагы кызматташуу таасирин берип жатканы айтылат.
Мамлекет башчысы кыргыз-кытай мамилеси кылымдарды карытканын айтып, байыркы Улуу Жибек Жолуна барып такаларын белгиледи.
Өз кезегинде Кытай эл республикасынын төрагасы Си Цзиньпин Алмазбек Атамбаевге жана меймандас кыргыз элине аруу тилектерин айткан телеграммасын жолдогон. Цзиньпин өз куттуктоосунда Кыргызстан менен Кытай стратегиялык өнөктөш кошуналар экенин айтып, эки элдин достугу бай тарыхка ээ экенин белгилеген.
