БИШКЕК, 11-ноя. — Sputnik. Жергиликтүү кеңештерге болгон шайлоо боюнча үгүт иштери башталганын Бишкек аймактык шайлоо комиссиясынын атайын өкүлү Максат Турумбеков билдирди.
10-октябрда Алмазбек Атамбаев 11-декабрда жергиликтүү кеңештерге шайлоо дайындоо боюнча Жарлыкка кол койгон. Мыйзамга ылайык, шайлоого бир ай калганда үгүт иштери башталат.
"Үгүт иштери шайлоого бир күн калган жымжырттык күнүнө чейин уланат. Шайлоого катышчу саясий партиялар аймактык шайлоо комиссиясынын атайын топторуна келип үгүт материалдарын көрсөтөт. Алар материалдарды тыюу салынган чакырыктардын бар-жогун текшерет", — деди Турумбеков.
Үстүбүздөгү жылдын 11-декабрында 22 шаарда жана 384 айылда жергиликтүү кеңештерге шайлоо өтөт. Бишкекте үгүт иштерин 14 партия жүргүзөт.
