БИШКЕК, 2-ноя. — Sputnik. Ким "лох" боло турганын эртең көрөбүз. Бул тууралуу "Ата Мекен" фракциясынын лидери Өмүрбек Текебаев парламентте сүйлөп жатып билдирди.
Эл өкүлү бийлик айрым депутаттарды коалицияга киргизебиз деген жүйө менен Баш мыйзамды өзгөртүүгө добуш бердириши мүмкүн экенин белгиледи.
"Өткөн чакырылышта экс-спикер Ахматбек Келдибековду төрагалыктан алалы деп калдык. Добуш чогултсак биздики аздык кылат экен. Анан КСДП коалициядан чыгып кетти да, ким жаңы коалицияга кирем десе, "Ата-Журт" фракциясын колдобогула дедик. Ошентип коалицияга кирүү үчүн "Ата-Журттун" депутаттары экиге бөлүнүп кетти. Биздин коалицияны жазда деле таратса болмок. Бирок азыр таратып туруп, ким Конституцияны өзгөртүүнү колдосо, ошол коалиция кирет дешет. Анан ким "лох" болорун эртең көрөбүз", — деди Текебаев.
"Ата Мекен" лидери Баш мыйзамдын өзгөрүшү менен президенттин ыйгарым укуктары кеңейет деген пикирде.
