Атамбаев Баш мыйзамга киргизилүүчү өзгөртүүлөрдү жактырды

БИШКЕК, 21-сен. — Sputnik. Алмазбек Атамбаев өлкө Конституциясына оӊдоолордун демилгечилери сунуштаган соӊку текст менен таанышкан соң бул мыйзам долбоорун колдой турганын билдирди. Бул тууралуу өлкө башчынын мааламыт кызматы кабарлады.

Эскерте кетсек, КСДП, "Кыргызстан", "Өнүгүү-Прогресс" жана "Республика-Ата-Журт" фракциялары референдум жолу менен Конституцияга өзгөртүүлөрдү киргизүү демилгесин көтөргөн. Бул коомчулукта ар кандай кайчы пикирлерди жаратып келет.

"Жогорку Кеңештин депутаттары мамлекет башчысы жактырган Конституцияга өзгөртүү киргизүүнү элдин өзүнө чечкенге мүмкүнчүлүк берип, мыйзам долбоорун референдумга коёт деп ишенем", — деп билдирди президен. 

Өлкө башчынын айтымында, депутаттардын мындай чечими Кыргызстандын көз карандысыздыгын бекемдөө, адилет жана натыйжалуу саясий система түзүүгө карай жалпы багытты колдоо катары бааланат.

"Өз элинин жана өлкөсүнүн келечеги үчүн биримдикке келген учурлар ар бир мамлекеттин тарыхында кездешет. Кыргызстандын эли жана Жогорку Кеңеш президент Атамбаевдин мамлекет жана мамлекеттик ишмердигинде эч качан жеке максаттары болбогонуна өткөн беш жылда ынанды деп ойлойм. Кыргызстандыктар жана депутаттар чагымчыларды ээрчирине, Атамбаевдин бийликти узурпациялоо, президенттик мөөнөтү аяктагандан кийин да бийликте калуу максаты жана каалоосу бар деген сандырак сөздөргө ишенерине көзүм жетпейт", — деди өлкө башчы.

Атамбаев Акаевдин жана Бакиевдин тушунда конституциялык өзгөртүүлөрдү бийлик ошол кездеги президенттер менен алардын үй-бүлөлөрүнө ылайыктап өткөрүп келишкенин, а кезде оппозиция эмнеге каршы чыкканы түшүнүктүү экенин белгиледи. Ал эми бүгүнкү негизги каршылаштар, тилекке каршы, бир гана жеке амбицияларынан улам чыгууда. Алар өзгөртүү зарылдыгына макул, бирок маселеге бөгөт коюу үчүн ар кандай себептерди таап жатышат. Бул мамлекеттик мамиле эмес. Бул өлкө келечегин тоготпогондук, деди президент.

Өлкө башчы ошондой эле алардын сунушталган оӊдоолордун арты менен "президенттин айланасынын" бийликте калуу аракети деген "аргументтери" да суу кечпейт. Андайдын жыты да жок экени сабаттуу адамга көрүнүп турарын айтат. 

"Негизи эле Кыргызстанда кийинки мамлекет башчысы ким болорун бир же эки жыл мурда эле көрө билген учур болгон эмес, менимче, болбойт дагы. Ошондуктан, "мураскер" операциясы дегенди четке кагарымды дароо эле билдиргем. Оӊдоолор парламентти алсыздандырып, премьер-министрди өтө эле күчтөнтөт дегенге да негиз жок. Тетирисинче, көпчүлүк коалиция күчтөндүрүлүп, чыныгы парламенттик оппозиция пайда болот. Бул оӊдоолор – Кыргызстандын чыныгы парламентаризмди бекемдөөгө карай дагы бир кадамы", — деди Атамбаев.

Ошондуктан Жогорку Кеңеш Конституцияга оңдоо киргизүү боюнча бул мыйзамды колдоп, элдин өзү референдумда тандаганга мүмкүнчүлүк берсе, ал депутаттардын стратегиялык жана акыйкаттык туура чечими болуп калмакчы, деп белгиледи президент.