БИШКЕК, 15-сен. — Sputnik. "Ата Мекен" фракциясынын лидери Өмүрбек Текебаев маалымат жыйында сүйлөп жатып, КТРКнын директору Илим Карыпбековду туура, так иштөөгө чакырды.
"Ата Мекендин" лидери 2010-жылы Бакиев түшпөс хандай болуп турганын айтып, азыр алар жок экенин белгиледи.
"Илим, объективдүү бол. Бардык тарапты бирдей чагылдыр. Бакиев менен жүрүп аман калдың, эгер дагы туура эмес иштей берсең, Атамбаев менен жүрүп аман калбайсың", — деди Текебаев.
Ал эми КТРКнын башкы директору Илим Карыпбеков Sputnik Кыргызстан агенттигине КТРК бир нерсени жашырган күндө дагы маселе чечилип кетпей турганын билдирди.
"Учурда жалпыга маалымдоо каражаттарынын саны абдан көп болгондуктан, атаандаштык күч алган. Буга ылайык коомдук канал бир нерсени жашырган күндө дагы башкалар айтып, жазып чыгат", — деп билдирди Карыпбеков.
Ал ошондой эле объективдүү болуу үчүн колдон келген аракеттер жасалып жатканын айтып, Өмүрбек Текебаевдин нааразычылык пикири эске алына турганын кошумчалады.
