БИШКЕК, 2-сен. — Sputnik. Айрым саясатчылардын абалды козутуу аракети ишке ашкан жок. Бул тууралуу президент Алмазбек Атамбаев Ата-Бейитте Үркүндө каза болгондордун элесине арналган мемориалдын ачылыш аземинде билдирди.
Анын айтымында, учурда каргашалуу окуя иликтенип, көптөгөн документтер быйыл гана ачыкка чыккан. Бирок кээ бирлер алардын кыргыз элинин кызыкчылыгы менен төп келишпеген булактарын туура эмес максатта пайдаланып жатат.
"Саясий кызыкчылыктар үчүн тарыхты бурмалоого эч кимдин акысы жок. Айрым саясатчылардын кырдаалды козутуу аракетинен майнап чыкпай калды. Бул элибиздин даанышмандыгы менен алысты көрө билгенинен кабар берет", — деди Атамбаев.
Мемориал бир нече элементтен турат: уук түрүндөгү үч ири стелланын үстүнө түндүк орнотулуп, андан жоготууну чагылдырган бош үзөңгү түшүп турат. Андан сырткары, 1916-жылдагы окуялардын көтөрүлүш, Үркүн, Ата мекенге кайтуу жана совет бийлигинин орношунан кийинки төрт этабын түшүндүргөн барельеф орнотулган.
