БИШКЕК, 23-май — Sputnik. Премьер-министр Мамлекеттик мүлктү башкаруу фондусунун төрагасы Алмазбек Кадыркуловду кабыл алып, мекеменин ишин катуу сынга алды. Бул тууралуу өкмөттүн маалымат кызматы билдирди.
Жээнбеков өкмөттүн бир катар токтомдорун ишке ашырбаган фонддун иши канааттандырбай турганын айтып, тез арада чечилиши зарыл болгон тапшырмаларды койду.
Сынга мамлекеттик менчикти ижарага берүү иши да кабылды. Өкмөт башчы ижарадан түшө турган каражатты көбөйтүү боюнча бир катар иш-чараларды өткөрүүнү тапшырып, электрондук маалымат системасын тез арада ишке киргизүүгө милдеттендирди.
Мындан тышкары, Жээнбеков мүлк чырларына байланышкан сот иштери создугуп жатканына нааразы экенин билдирди. Натыйжада мамлекеттик органдардын жоопкерчилигин жогорулатууга басым жасап, аталган фонддун жетекчиси Кадыркуловго сөгүш жарыялады.
