БИШКЕК, 16-июль — Sputnik. Данияр Нарымбаев президенттин аппарат жетекчиси кызматынан бошотулду. Тийиштүү буйрукка өлкө башчысы Алмазбек Атамбаев кол койгонун президенттин маалымат кызматы билдирди.
Нарымбаев ЖК депутаты Хаджимурат Коркмазовго ачылган кылмыш иши иликтенип аткан учурда ээлеген кызматынан бошотуу боюнча президентке арыз менен кайрылган болчу.
Буга чейин бир катар жалпыга маалымдоо каражаттары экс-депутат Нариман Түлеевдин үй-бүлөсүнөн пара талап кылганы үчүн президенттин аппарат жетекчиси кармалганын жазып чыгышкан. Бирок, президенттин аппаратынын жетекчиси Данияр Нарымбаев ага коюлган айыптарды четке кагып, өзүнүн кармалганы боюнча ЖМКлардан укканын айткан. ЖК депутаты Хаджимурат Коркмазов 100 миң доллар пара алганы үчүн кармалган. Түлеевдердин үй-бүлөсүнөн пара алуу аракеттерине Нарымбаевдин да тиешеси бар деп бир катар ЖМКлар жазып чыгышкан.
