БИШКЕК, 15-дек — Sputnik. Премьер-министр Жоомарт Оторбаев ШКУга мүчө мамлекеттердин өкмөт башчылар кеңешмесинин алкагында Казакстандын премьер-министри Карим Масимов менен жолукту. Бул туурасында өкмөттүн маалымат кызматы билдирди.
Жалпы талкуу суу-энергетикалык, айыл чарба, чек ара жана чектеш кызматташтык жаатындагы, ошондой эле темир жол жана транспорттук инфраструктураны өнүктүрүү, эки өлкөнүн маданий-гуманитардык кызматташуусун активдештирүү боюнча болду.
"Акыркы кездерде кыргыз-казак кызматташуусу тийиштүү динамикага жана практикалык багытка ээ болуп, активдүү саясый-экономикалык баарлашуу болууда. Шериктеш мамлекеттердин демилгелери ар кыл эл аралык уюмдарда жана интеграциялык бирикмелерде активдүү колдоого алынууда», — деди Оторбаев.
Оторбаев 2014-2015-жылдардын күз-кыш мезгилинде Казакстандан Кыргызстанга электр энергиясын сатууну уюштуруу боюнча келишимдин өз мөөнөтүндө иштелип чыгуусу боюнча маселеге басым жасады.
Андан сырткары тараптар Казакстандын "Луговая" станциясындагы Күйүүчү жана майлоочу май жүктөлгөн вагондордун кармалып турушун талкуулашты. Оторбаев аталган маселенин тез арада чечилишине ишенээрин билдирип, Карим Масимов Казакстандын тийиштүү ведомстволоруна аталган маселени чечилишин тездетүү тапшырмасын берди.
