БИШКЕК, 17-ноя — Sputnik. Бажы биримдигине (ББ) кошулуу Кыргызстандын айыл чарба жана азык-түлүк өндүрүүчүлөрүнө кеңири мүмкүнчүлүктөрдү ачат деп эсептейт өлкө президенти Алмазбек Атамбаев. Бул туурасында РИА Новости жазды.
Кыргызстандын ББга кирүүсү жөнүндө келишимге кол коюусу 23-декабрга пландалууда. Май айында Астанада болгон Евразиялык экономикалык Биримдик боюнча жыйында Кыргызстандын ББга кошулуу иш-чараларынын планына кол коюлган. Учурда мыйзам долбоорлорунун зарыл болгон топтому Жогорку Кеңештин кароосунда. Кыргызстан бардык документтерди кабыл алууга үлгүрө тургандыгына Өкмөт ишенет.
"Кыргызстан Бажы биримдигине кирүүгө камынып жатат. Интеграциялык процесстер ата мекендик айыл чарба продукцияларын, азык-түлүктү өндүрүүчүлөргө жана кайра иштетүүчү ишканаларга кенен мүмкүнчүлүктөрдү ачат. Дыйкандар менен кайра иштетүүчүлөрдүн болгон тажрыйбаларын, айыл чарба тармагындагы окумуштуулардын илимий мүмкүнчүлүктөрүн пайдаланып, Кыргызстан чөлкөмдөгү мал чарба жана айыл чарба продукцияларынын алдыңкы экспорттоочуларынын бирине айлануусу керек", — деп билдирди Атамбаев.
Бүгүнкү күндө Кыргызстан өз керектөөчүлөрүн азык-түлүк менен камсыз кылууга мүмкүнчүлүгү да, кудурети да жетет, бирок ага карабай, чет өлкөдөн азык-түлүктү өзү чыгаргандан көп ташып кирет деп белгиледи ал.
Республиканын Улуттук туруктуу өнүктүрүү стратегиясында айыл чарба өнөр жай комплекси өлкөнүн экономикалык өнүгүүсүндөгү эң артыкчылыктуу багыттарын бир деп белгиленгендигин эске салды. "Өз продукцияларын башка өлкөлөргө экспорттоого даяр мекендик фермерлерди жана өндүрүүчүлөрдү ар тараптуу колдоо керек", — деп айтты мамлекет башчысы.
ЕврАзЭШ кантип түзүлгөн
Евразиялык экономикалык шериктештик (ЕврАзЭШ) — евразиялык интеграциялоонун алкагында Россия, Беларусь, Казакстан, Кыргызстан жана Тажикстандын Бажы биримдигинин негизинде 2015-жылдын 1-январынан тартып түзүлүп жаткан экономикалык биримдик. Экономика тармагында мамлекеттер аралык интеграциялоонун алкагында кызматташтык мурдагы советтик мейкиндикте 1990-жылдардын аягынан бери жүргүзүлүп келе жатат. 1999-жылдын 26-февралынан тартып Беларусь, Казакстан, Кыргызстан, Россия жана Тажикстан Бажы биримдиги жана Бирдиктүү экономикалык мейкиндик тууралуу Келишимге кол коюшкан.
