БИШКЕК, 17-ноя — Sputnik. Жогорку Кеңештин төрагасы Асылбек Жээнбеков расмий иш сапар менен Жапонияда 18-20-ноябрь күндөрү болот. Бул туурасында ЖКнын басма сөз кызматы билдирди.
Спикер Күн Чыгыш өлкөсүнө Жапония Парламентинин кеңешчилер Жыйынынын Президенти Масааки Ямадзакинин чакыруусу менен бара жатат.
Расмий иш сапардын алкагында Жапония Парламентинин эки палатасынын спикерлери, Жапония жетекчилиги менен жолугушуулар болуп, эки тараптуу кызматташуу талкууланмакчы.
Сапар учурунда парламентарийлердин "Технологиялык өркүндөтүүнү алга жылдыруу жана инновациялык жетишкендиктерге көмөктөшүү" боюнча ассоциацияга (TEPIA), "Токионун кичи жана чакан бизнесинин өнөр-жай көргөзмөсү – 2014" айыл чарба өнөр жайынын көргөзмөсүнө баруусу пландалууда. Жапониянын эл аралык кызматташтык агенттигинин (JICA) Президенти Танака менен да сүйлөшүүлөр болот.
Жапонияга иш сапар алкагында парламентарийлер Токио шаарындагы кыргыз диаспорасынын өкүлдөрү менен жолугушмакчы.
