БИШКЕК, 21-май — Sputnik. Айдоочулар Каракол шаарынан алынып келген оор жүктү "Илбирс" имаратынын жөө жүргүнчүлөргө арналган жолунда жайгашкан дүкөнгө түшүрүшкөнүн JICA агенттигинин коом менен байланыш бөлүмү Sputnik сайтынын кабарчысына билдирди.
Буга чейин интернетте Т 60 017 кызыл номерлүү автомашинанын "Ала-Тоо" аянтындагы "Илбирс" имаратынын жөө жүргүнчүлөргө арналган жолунан өтүп, ыңгайсыздык жараткан видеосу жарыяланган. Аталган автомашина Япониянын эл аралык кызматташтык агентигинин (JICA) долбоорлорунун бирине таандык экени аныкталган.
Автомашинанын айдоочусу "Бир айыл – бир продукт" долбоорунун кызматкери.
© Ажар Алапаева
"Борбордук аянтта аталган долбоордун алкагында көлдүктөрдүн өндүргөн товарларын сата турган дүкөн бар. Бул жолу дүкөнгө оор жүк алып келишкен. Биз анын жол эрежесин бузганын билебиз, мындай экинчи кайталанбайт", — деп аталган мекемеден сөз беришти.
Агенттиктен билдиришкендей, аталган айдоочуга карата чаралар көрүлөт. Азырынча кандай чара көрүлөрү белгисиз, аны долбоордун жетекчилиги аныктайт.
