Ош, 10-янв — Sputnik. УКМКнын Ош облустук жана Ош шаардык башкармалыгы 2014-жыл ичинде Сириядан кайтып келип, Кыргызстанда ар кандай теракттарды уюштурууну пландаган жана жихадга акча чогултуу максатында элди талап-тоногон үч топту кармаган.
"Биздин учурдагы негизги иш багыттарыбыздын бири – жихадизмге каршы күрөшүү, себеби, бул маселе азыр жарандардын, мамлекеттин коопсуздугу үчүн чоң көйгөй жаратып жатат. Маселенин тамырына карай келгенде, Сирияга кетүүнүн негизги себеби, — элдин маалыматынын аздыгы болууда. Андыктан, бул жаатта кеңири масштабдагы профилактикалык иштерди жүргүзүүнү баштоо алдында турабыз", — деди УКМКнын маалымат кызматынын жетекчиси Рахат Сулайманов.
Сирияда атайын даярдыктан өткөн биздин өлкөнүн жарандары Кыргызстанда ар кандай теракттарды уюштуруу жана элди талап-тоноп жихадга акча чогултуу үчүн атайын кайтып келишкен. УКМКнын Ош облустук жана Ош шаардык башкармалыгы 2014-жылдын башынан бери иликтөөлөрдү жүргүзүп келип, мындай максатта түзүлгөн бир нече террористтик топторду кармаган. Учурда алардын бир канчасынын иши сотко өтсө, бир тобу убактылуу кармоо жайына жайгаштырылып, тергөө иштери уланууда. УКМКнын Ош облустук жана Ош шаардык бөлүмүнөн бул террористтик топтордун кээ бир мүчөлөрү мурда сот жообуна тартылган кылмышкерлер экендигин айтышты.
