БИШКЕК, 15-дек. — Sputnik. Москвадагы мигранттарды полицияга салып берген элчиликтин аракети боюнча тиешелүү чечим кабыл алуу керек. Бул тууралуу "Бир Бол" фракциясынын депутаты Улукбек Ормонов ЖКда ар кандай маселелер каралып жатканда билдирди.
Эске сала кетсек, буга чейин Москвадагы мигранттар элчиликтин алдына келгенде алардын төртөөсүн полиция кармап кеткен.
"Мигранттар элчиликтен жардам сурап алдына барса, элчи жолугуп койгондун ордуна полицияга салып берген. Бул кадамы боюнча бир чечим кабыл алышыбыз керек", — деди депутат.
Ал мигранттар жыргаганынан Москвага барбаганын айтып, алардын көйгөйлөрү көп экенин кошумчалады.
Белгилей кетсек, буга чейин элчилик мигранттарды полицияга кармап бербегендигин расмий билдирген.
