БИШКЕК, 12-ноя — Sputnik. Москвада КРдин ИИМ жетекчиси Мелис Турганбаев менен РФтин ИИМ башчысы Владимир Колокольцев эки өлкөнүн кызматташуу документтеринин алкагында кылмыштуулука каршы биргелешип күрөшүү маселесин талкуулашты.
КР ИИМине өнөктөш мамлекет тарабынан бериле турган материалдык-техникалык жана башка жардамдар да талкуунун негизги темаларынын бири болду. Бул туурасында Кыргызстандын РФтеги элчилигинен билдиришти.
Учурда диний-экстремисттик жана уюшкан кылмыштуулук улам күч алып бара жаткандыктан, КР менен РФ ИИМдеринин расмий өкүлдөрүнүн укуктук макамын жөнгө салуу зарылчылыгы пайда болду. Анан сырткары Россия аймагындагы кыргыз жарандарынын укугун жана коопсуздугун коргоодо да мындай макам маанилүү болуп турат.
Мындан бир аз убакыт мурда Москадагы кыргыз диаспора өкүлдөрү ЖКнын спикери Асылбек Жээнбеков менен жолугуп жатканда бул маселени көтөрүшкөн. Спикер аталган суроо жакында эки тараптын ИИМ жетекчилери менен болгон жолушугууда такталып, сүйлөшүлөөрүн айткан эле.
Кыргыз Республикасынын ички иштер министри Мелис Турганбаев Москвага кесиптеши Владимир Колокольцевдин Россиянын ички иштер кызматкерлеринин Күнүнө карата болгон салтанатка чакыруусу менен кеткен.
