БИШКЕК, 4-ноя — Спутник Кыргызстан. Москвадагы "Кыргыз биримдиги" коомдук фондунун вице-президенти Тилек Додоновдун жергиликтүү ЖМКга берген маалыматына ылайык, Россияга кирүүнүн жаңы шарттарына мигранттардын көбү даяр эмес.
"Россия мындай талапты 2013-жылдан баштап эле айта баштаган. Ошентсе да, шарттардын өзгөрүшүнө көпчүлүк мигранттар даяр эмес. Аларга көбүрөөк маалымат берүү керек", – дейт ал.
Жаңы шарттарга ылайык, жашы 16га толо элек балдарга да сыртка чыгуучу паспорт алуу керек. Буга чейин жашы жете элек балдар туулгандыгы жөнүндөгү күбөлүгү менен эле Россиянын чек арасынан өтө беришчү.
Андан сырткары, жаңы эрежелер боюнча Россияда иштеп жаткан кыргызстандык эмгек мигранттарынын бардык келишимдик документтери сыртка чыгуучу паспорт менен гана түзүлөт.
