БИШКЕК, 23-дек. — Sputnik. Бүгүн Бишкектеги Москва менен Ибраимов көчөлөрү кесилишкен жерде айдоочу жөө адамга ок чыгаргандыгы тууралуу Sputnik Кыргызстан агенттигине күбө билдирди.
Анын айтымына караганда, окуя болжол менен саат 11.30дар чамасында болгон.
"Москва көчөсүнөн көп кабаттуу үйлөрдүн короосуна кайрылып бараткан унаанын алдынан жөө адам чыгып калды. Айдоочу ага жол бербей койгонбу, айтор, экөө сүйлөшүп туруп эле мушташа кетишти. Унаада отурган айдоочунун аялы сыртка чыга калып жолдошуна болуша баштады. Тиги адам аялга асыла баштаганда айдоочу жубайына болуша кетип жөө адамды карай ок чыгарды", — деп жазды күбө.
Анын айтымына караганда, окуя болгон жерге Тез жардам кызматы чакырылып, айдоочуну милициялар алып кеткен.
Ал эми айдоочу кош бойлуу жубайына болушуп, аны коргоо үчүн ок чыгарууга барганын айтты.
