СУЗАК, 16-дек. — Sputnik. Сузак районунун борборунда бешинчи күн сайын боло турган базар райондогу "Достук" эс алуу багынын аймагына көчүп келгенин жергиликтүү кабарчыбыз билдирди.
Маалыматка ылайык, аталган эс алуу багында Улуу Ата Мекендик согушта, Афган жана Баткен окуяларында курман болгондорго арналып эстеликтер орнотулган.
Сатуучулар бул жерге товар жүктөлгөн унаалары менен кирип алышкандыктан буга ардагерлер гана эмес, сатуучулар дагы нааразычылыктарын билдирип жатканын кабарчыбыз билдирди.
Баткен окуясынын катышуучуларынын Сузак районундагы төрагасы Аскар Рамазанов эс алуу багына коюлган эстеликтер тебелеп-тепселенип жатканын айтты.
"Бул жерге Ата мекендик согушта, Афган жана Баткен окуяларында каза болгондор үчүн эстелик тургузулган. Эми бул жакта ошолорду тебелеп-тепсеп жатышат. Ушуга уруксат берген чоңдорубузду түшүнгөн жокмун", — деп Рамазанов нааразычылыгын билдирди.
Ал ошондой эле бул жерге эстеликти тургузуу иштери төрт жыл мурун башталганын, бирок коюлган эстеликтерди бузуп кеткен көрүнүштөр уланып жатканын баса белгиледи.
"Бул жерди үч жолу бузушту. Тийиштүү органдарга кайрылсак, алар таап бере алышкан жок. Быйыл эле оңдоо иштерин жүргүзгөн элек, "Эрдик" медалын кайтадан жулуп кетишиптир. Биз деле акчабызга жараша курганбыз. Өлгөн балдарыбыздын аты өчпөсүн деп аракет кылдык эле. Бул жакка эккен газондор дагы тебелендиде калды", — деди ал.
Кечээ берилген эскертүүнү көпчүлүк соодагерлер угушкан эмес. Себеби жумадан башка күндөрү саналуу гана адам базарга чыгат. Соодагерлер базарга кечээ келгендер орундуктарды ээлеп алганын айтышты. Мындан тышкары, аталган жайда негизги шарттар жок, тартип орнотуу үчүн кылып жаткандан кийин үстүн жаап, шарттарды түзүп бериш керек эле. Соодагерлердин айтымында, азыр баары эки-экиден урушуп, орун талашып жатышат.
