БИШКЕК, 21-ноя — Sputnik. Акыркы төрт күн ичинде борбор калаада жааган кардан 73 дарак кулаганын мэриянын маалымат кызматы билдирди.
"Зеленстрой" ишканасы дем алыш күндөрү калаа тургундарынан түшкөн кайрылууларынан улам кулаган 38 дарак менен 50 бутакты тазалашты.
"Төрт күн ичинде калаа тургундарынан 410 арыз келип түшүп, "Зеленстрой" 194 бутак жана 73 даракты жолдон тазалаган. Тазалоо иштерине 120 кызматкер, 27 атайын техника тартылган", — деп жазылат маалыматта.
Дем алыш күндөрү кулаган дарактардан 15 жаштагы бала жабыркап, ага учурунда медициналык жардам берилген. Учурда "Зеленстрой" ишканасынын кызматкерлери шаарды кулаган дарактардан тазалоону улантып жатат.
