БИШКЕК, 25-окт. — Sputnik. Бишкектин Биринчи Май РИИБине шаар тургуну анын 16 жаштагы кызын төрт студент кыз сабап салганы боюнча арыз жазган. Бул тууралуу ИИМдин маалымат кызматы билдирди.
Буга чейин Facebook социалдык тармагында Narine Ter-Akopova аттуу колдонуучу окуучу кызды студент кыздар сабаганы боюнча жазган. Алардын бирөө " мурдагы жигитин кызганганы" айтылган.
"Алар кызды күч менен Lexus lx 470 машинасына салып, Белинский/Бөкөнбаевдеги үйлөрдүн короосуна алып келген. Башка, ичке жана бөйрөк тушка чабышкан. Учурда сабалган кызды "менин атам бардыгын чечет" деп айтып коркутууда", — деп жазат Narine Ter-Akopova.
ИИМ аталган окуя боюнча арыз 21-октябрда эле Биринчи Май РИИБине келип түшкөнүн билдирди.
"Сот-медициналык экспертиза дайындалды. Анын жыйынтыгы менен кыздын алган жаракаты аныкталат. Ошондой эле экспертизанын жыйынтыгы менен кылмыш ишин козгоп-козгобоо маселеси да чечилет", — дейт ИИМдин маалымат кызматынын өкүлү Елена Аильчиева.
Учурда тергөө уланууда.
Жабыр тарткан кыздын туугандары ал учурда ооруканада жатканын маалымдашты.
