БИШКЕК, 17-окт. — Sputnik. АКШга жиберем деп алдоо менен кыргызстандык жарандын 6500 долларын алган бойдон изин суутуп кеткен жаран кармалганын Бишкек шаардык ички иштер башкармалыгынан кабарлашты.
Билдирмеге караганда, 14-октябрда 33 жаштагы жаран милицияга арыз менен кайрылган.
"Арыз ээси чала тааныш адам анын ишенимине кирүү менен АКШга жиберем деп 6500 доллар алган бойдон жоголуп кеткенин айткан. Аталган фактыга ылайык Кылмыш жаза кодексинин 166-беренеси (алдамчылык) боюнча кылмыш иши козголгон", — деп айтылат маалыматта.
Ыкчам иликтөөнүн натыйжасында кылмышка шектүү катары Жалал-Абад облусунун 40 жаштагы тургуну кармалган. Ал башка жарандарды дагы алдоого шектелип жатат. Кармалган жаран убактылуу камоочу жайга киргизилип, тергөө иштери уланууда.
