БИШКЕК, 5-окт. — Sputnik. Бишкектин түштүк-чыгышында жайгашкан Орто-Сай айылына бараткан жолдо кызды коюп кетти деп шектелип жаткан айдоочу кармалганын Sputnik Кыргызстан агенттигине Чүй облустук Кайгуул милициясы кабарлады.
Окуя ишемби күнү болгон. Анда Volkswagen Passat унаасынын айдоочусу 18 жаштагы студент Алена Копинаны коюп кеткени айтылат. Ал эми күбөлөрдүн айтымында, унаанын ичиндеги тогуз кишинин баары тең мас абалында болгон. Ал эми жабырлануучунун апасы кызды коюп кеткенден кийин да машинанын ичиндегилер ага көңүл бурбай арак ичүүнү улантканын билдирди.
Кайгуул милициясынын маалыматына ылайык, айдоочунун ким экени такталып, ал кармалды.
"Күбөлөр айдоочунун мас экенин айтышты, жол кырсыгы болгондон кийин аны ал жерден алып кетүүгө аракет кылып, машинаны башка адам айдап баратканын далилдөөгө аракет кылышкан. Бирок, күбөлөр анын баарын сүрөткө тартып алышкан. Анда рулда мас айдоочу отурганы көрүнүп турат", — деп айтылат маалыматта.
Кайгуул милициясы айдоочунун арак ичкени аныкталганын билдирди. Учурда кылмыш ишин козгоо маселеси каралууда.
