БИШКЕК, 22-сен. — Sputnik. Бишкек ШИИБдин Кайгуул милициясы эки баласы менен бараткан аялды тебелеп кетти делген айдоочунун сүрөтүн жайылтты.
Маалыматка ылайык, шаршемби күнү болжол менен саат кечки 18.40та Infiniti үлгүсүндөгү жол тандабастын айдоочусу Бишкектин түштүк-батыш тарабындагы көрүстөндүн жанынан эки баласы менен бараткан аялды коюп, из суутуп кеткен. Бир нече чакырымдан кийин скутердин айдоочусун сүзүп, андан соң май куюучу жайдын тосмосун жөөлөп барып токтогон. Бирок токтобостон андан ары качып кеткен.
"Биз 1981-жылы туулган Жалилов Рустам Артуровичти издеп жатабыз. Алган маалыматыбыз боюнча ал бейшембиге караган түнү Казакстанга өтүп кеткен. Учурда аны казак кесиптештерибиз да издеп жатат", — деди Sputnik Кыргызстан агенттигине Кайгуул милициясынын издөө бөлүмүнүн жетекчсиси Ажыбек Майназаров.
Sputnik кабарчысы менен сүйлөшкөн май куюучу жайдын операторунун бири жол кырсыгына себепкер айдоочу милиция келе электе эле кетип калган.
"Мен аны кайтарып келдим. Артынан барып, эмнеге качып баратканын сурадым. Кайтыңыз, азыр милиция келет деп артка кайырдым. Аябай мас экен. Эл көбөйө баштаганда кайра качып кетти, байкабай калдым", — деди ал.
Бишкектеги Травматология жана ортопедия илим изилдөө борборунан жол тандабас тебелеп кеткен аял ооруканага жансыз келгенин айтышты.
Ушу тапта жол кырсыгына кабылган келиндин 23 жашта экени белгилүү болду. Анын эки жаштагы жана үч айлык наристелери жеңил жаракат алышкан. Аларды №3 балдар ооруканасына алып кетишкен.
Ал эми скутердин айдоочусу учурда ооруканада дарыгерлердин көзөмөлүндө болууда.
