БИШКЕК, 29-авг. — Sputnik. Баткен районунун Актатыр айыл аймагынын 23 жаштагы тургуну мал жайып жүрүп жоголуп кеткенин ӨКМ билдирди.
Маалыматка ылайык, окуя "Геревшин" жайлоосунун Аксуу тилкесинде болгон. Үстүбүздөгү жылдын 26-августунда үч бир тууган мал жайып жүрүп, аларды караганы үчөө үч тарапка бөлүнүшкөн. Балдардын бирөө кайрылып келген эмес. Эки бир тууган инисин издеп таба албай айылдагы урук-туугандарына билдиришкен. Эртеси туугандары менен бирге издөөдөн да майнап чыкпагандыктан, жергиликтүү бийликке кайрылышкан.
Аталган жарандын дайынсыз болуп жатканы тууралуу маалымат Өзгөчө кырдаалдар министрлигинин бөлүмүнө 28-август күнү түшкөн.
Бүгүнтөн баштап жайлоодо жоголуп кеткен жаранды издөө иштери жүрүп жатат.
