БИШКЕК, 26-авг. — БИШКЕК. Борбор калаада бүгүн башка жарандарды өзүнүн катарына азгырып жүргөн "Ислам мамлекети" террордук уюмунун жашыруун ячейкасы кармалды. Бул туурасында Бишкек шаардык ИИББдин маалымат кызматынан кабарлашты.
Мурда алынган маалыматтардын негизинде ИИМдин 10-Башкы башкармалыгынын, ШИББ жана УКМКнын кызматкерлери ыкчам-иликтөө иштери жасап, "Ислам мамлекетинин" мүчөсүн ижарага алынган батиринен кармады.
Маалыматтарда 43 жаштагы Россиянын жараны жашап турган батирден курал-жарактар, аталган террордук уюмдун желеги, экстремисттик маанайдагы адабияттар табылган. Мындан сырткары, медициналык бет каптар, тарсылдагы бар эки граната, кара бет каптар, калем менен дептерге жазылган диний мазмундагы тексттер, 6 сим-картасы менен мобилдик телефон, бейсбол ойногон таяк, фармацевттик психотроптук зат, ширеңкенин кутусуна салынган апийим жыттанган баңгизат, ноутбук чыккан.
Учурда аны менен байланышкан башка жашыруун тараптарды аныктоо жана иликтөө иштери башталды.
