БИШКЕК, 14-авг. — Sputnik. Өткөн аптада Москва шаарындагы "Рязанский проспект" метросунда эки адамды союп, бир кишини жарадар кылды делген жаран кармалды. Бул тууралуу РИА Новости укук коргоо органдарына шилтеме берүү менен жазып чыкты.
Буга чейин жалпыга маалымдоо каражаттары 36 жаштагы кыргызстандык жарандын скинхеддердин колунан каза болгондугун жазып чыгышкан.
Укук коргоо органдарынын билдиришинче, кылмышка шектүү Иван Скоркин мас абалында эки жаранды союп, ага тоскоолдук кылган дагы бирөөнү жарадар кылган.
"Учурда кылмышка шектүү колго түшүп, убактылуу кармоочу жайда отурат. Анын баш коргоо чарасы каралууда. Скоркин буга чейин 2005 жана 2008-жылдары каракчылык беренеси боюнча соттолгон", — деп айтылат маалыматта.
Ал эми КРдин Россиядагы элчилиги 36 жаштагы каза болгон жаран Ош облусуна караштуу Кара-Суу районунун тургуну экендигин, учурда анын жансыз денесин мекенине алып келүү маселеси чечилип жаткандыгын билдирди.
