Ак-Суу, 4-июл. — Sputnik. Үстүбүздөгү жылдын 1-июлдан 2-июлга караган түнү нөшөрлөгөн жаандан улам Ысык-Көлдүн Ак-Суу районундагы Боз-Учук, Ак-Чий жана Ак-Булуң айылдарындагы айдоо аянттар зыян тартты.
Маалыматка ылайык, мөндүр жалпы жонунан 1408 гектар жерге айдалган жашылча-жемишти кагып кетти. Мында дыйкандар негизинен картошка, буудай жана арпа айдап оокат кылышчу.
Акыркы эки күндөн бери үч айылдын дыйкандары чыгымды санап жатышат. Ак-Чий айылынын тургуну Абдырасул Байсалов жерди насыя алып иштеткенин, эми жаз бою жасаган эмгеги талаага кеткенин айтты.
"70 миң сом насыя алып, картошка менен буудай эктим эле. Эми эмне кылышты билбей, кимге кайрыларымды да билбейм", — деди дыйкан.
Ал эми дагы бир жергиликтүү турган бир заматта эле баарынан кол жууп отуруп калганын айтып кейиди.
"Бир гектар жерге картошка айдагам. Үрөндү да бир килосун 15 сомдон сатып алгам. Аябай жакшы чыккан. Анан эле минтип бир түндө мөндүр баарын талкалап кетти. 50 миң сом карыз алгам. Күзүндө түшүм сатып кутулам деген ойдо элем", — деди ал.
Эскерте кетсек, аталган үч айылдын дээрлик бардык тургундары дыйканчылык менен күн көрүп келишет. Ал эми адистер учурда тактоо иштерин жүргүзүп жатат.
Ак-Суу райондук агрардык өнүктүрүү бөлүмүнүн башчысы Алдаяр Бейшекеев насыя алган дыйкандарга жеңилдик берүү боюнча өкмөт Айыл чарба министрлигине кайрылууга белсенип жатышканын айтты.
"Эми күз болсо эле насыя бергендер дыйкандардан акчасын доолай баштайт. Андыктан анын мөөнөтүн жылдыруу же кандайдыр бир жеңилдиктерди берүү боюнча өкмөткө, министрликке, Социалдык фондго кайрылалы деп жатабыз", — деди ал.
Белгилей кетсек, нөшөрлөгөн мөндүр айылдардагы бир нече турак жайларга, автоунааларга жана бак-дарактарга зыянын тийгизди. Учурда алар боюнча тактоо иштери жүрүп жатат. Мындан сырткары, райондогу үч көпүрө да зыянга учураган.
