БИШКЕК, 23-июн. — Sputnik. Алматы — Астана унаа жолундагы кырсыктан беш кыргызстандык жаран каза болгонун КРдин Тышкы иштер министрлиги билдирди.
Эскерте кетсек, кырсык Алматы — Астана унаа жолунун 385-чакырымында, башкача айтканда Алматы, Жамбыл жана Караганда облустарынын чектешкен жеринде болгон. Мында Mercedes Vito микроавтобусу менен Setra үлгүсүндөгү автобус кагышып кеткен.
"Каза болгондордун төртөө өспүрүм, бирөө аял экени белгилүү болду. Унаанын ичиндеги калган беш киши Приозерск шаарындагы ооруканада дарыланып жатат", — деп айтылат маалыматта.
Учурда Жамбыл РИИБ кызматкерлери каза болгондордун өздүгүн тактоо жана соттук-иликтөө иштерин жүргүзүү үчүн Узунагаштын өлүкканасына сөөктөрдү жеткирүү чараларын көрүп жатат.
Окуя болгон жерге Кыргызстандын Алматы шаарындагы Башкы консулдугунун кызматкери чыгып кетти.
