БИШКЕК, 11-апр. — Sputnik. Борбор калаадагы төрөтканада милиция кызматкери менен дарыгер жулкулдаша кеткенин Бишкек ШИИБден билдиришти.
Маалыматка ылайык окуя дүйшөмбү күнү болгон. Дарыгер милиция кызматкери аны сабаганын айтып, ага карата чара көрүү боюнча арыз жазган.
ШИИБден маалымдашкандай, алдын ала маалымат боюнча милиция кызматкери жаңы төрөлгөн баласын көрүү үчүн келген.
"Милиция кызматкери анын баласына керектүү деңгээлде чара көрүлбөй жатканын эскерткен. Дарыгер да ага жооп кайтарган. Алар айтыша кетип, милиция кызматкери дарыгерди жулкулдатып койгон. Ага кол көтөрүп, сабаган эмес", — деп ШИИБден билдиришти.
Учурда окуянын чоо-жайы иликтенип жатат.
