БИШКЕК, 19-фев. — Sputnik. Балыкчы шаарындагы 20636 аскер бөлүгүндө 18-февралда эки жоокер ок атуучу куралдан жаракат алып, шаардык ооруканага алып келинген. Бул тууралуу КР Куралдуу күчтөрүнүн башкы штабынын маалымат кызматы билдирди.
Маалыматка ылайык, 18-февралда саат 14.30га жакын ок атуучу куралдан атуу учурунда мөөнөттүү аскер кызматынын 21 жаштагы жоокеринин кабыргасына ок тийген. Ал дароо Балыкчы шаардык ооруканасына жеткирилген.
Ушул эле күнү болжол менен кечки саат 5.45тер чамасында куралга кылдат мамиле кылууну билбегендиктен катардагы жоокердин башына ок тийип, жаракат алган. Ал Балыкчы шаардык ооруканасынын жандандыруучу бөлүмүнө жеткирилген.
Башкы штаб окуялар боюнча кызматтык териштирүүнү баштады.
Штабдын маалымат кызматы билдиргендей, Балыкчы аскер гарнизонунун прокуратурасы бул факты боюнча тергөө иштерин жүргүзүп, жагдай аныкталууда.
