БИШКЕК, 18-янв. — Sputnik. Ысык-Көл облусунун Ак-Суу районунун Сырт өрөөнүндө ак илбирс аткан 48 жаштагы киши кармалды. Бул туурасында Ак-Суу райондук ички иштер бөлүмүнүн жетекчиси Асылбек Сааданов Sputnik Кыргызстан маалымат агенттигине билдирди.
Саадановдун айтымында, аларга ак илбирстин атылганы тууралуу ыкчам маалымат келип түшкөн.
"Ыкчам иликтөө иштеринин жүрүшүндө 16-январда кечинде ак илбирс аткан жаранды кармадык. Ал өз көрсөтмөсүндө илбирсти 15-январда кечинде аткан. Кыыл китепке кирген бул жаныбардын терисин сыйрып, башын жүктөп келе жаткан жеринен кармалды", — деди ал.
Сааданов учурда район аймагында браконьерликке каршы мобилдик топ иштеп жатканын айтып, алар күнү-түнү иштеп жатканын кошумчалады.
"Ак илбирс аткан кишиге 500 миң сом айып салынып, же үч жылга эркинен ажыратылышы мүмкүн. Кармалган жарандын баш коргоо чарасын сот аныктайт", — деди ал.
Кармалган жаран жергиликтүү мергенчилер коомунун мүчөсү болгон.
Белгилей кетсек, ак илбирс өтө сейрек кездешүүчү жаныбар болгондуктан, "Кызыл китепке" кирген. Аны атууга тыюу салынган.
NABU уюмундагы браконьерликке каршы Барс тобунун жетекчиси Курманбек Дүйшеевдин айтымында, Кыргызстандын аймагында 300гө жакын ак илбирс бар.
