БИШКЕК, 9-янв. — Sputnik. Нарын облусунун Кочкор районунда жана Жалал-Абад облусунун Тогуз-Торо районунда тамак-аштан уулануу (ботулизм) болуп, 24 киши жабыркап, анын экөө каза болгонун Саламаттык сактоо министрлиги билдирди.
Маалыматка ылайык, жабыркаган 24 кишинин 15и Кочкор районунун жана 9у Тогуз-Торо районунун тургундары.
Саламаттык сактоо министрлиги маалымдагандай, 6-7-январь күндөрү аталган райондордо тамак-аштан уулануу болгону тууралуу билдирүү келип түшкөн.
7-январда министрдин орун басары башында турган республикалык ыкчам штаб түзүлгөн.
Министрликтен кабарлагандай уулануудан жабыркаган 22 киши учурда тийиштүү жардамдарды алып жатат. Алардын 14ү республикалык жугуштуу оорулар клиникасында (бешөө кайра жандандыруу бөлүмүндө), Нарын облустук биргелешкен ооруканасында 5 киши жаткарылса, алардын үчөө өспүрүм жана бир кош бойлуу аял. Ал эми Кочкордогу аймактык ооруканада 3 жаран дарыланууда.
Жабыркагандар эмнеден ууланганын так аныктоо үчүн алар жеген тамак-аштын үлгүлөрү лабораториялык иликтөө үчүн алынды. Ошондой эле, дарыгерлер үймө үй кыдырып, жабыркаган кишилер менен байланышы болгондорду аныктоодо.
Ошондой эле, Кочкор районунда шек туудурган 134 банка маринаддалган бадыраң менен 132 банка козу карын сатыктан алынды.
